Kryetarja e Lëvizjes Socialiste për Integrim, Monika Kryemadhi deklaroi pak minuta më parë se mbledhja e sotme e Këshillit të Mandateve ishte një shembull i shëmtuar sesi duhet vepruar në rastet kur një deputet si Saimir Tahiri dyshohet si i përfshirë për trafik droge. Në një konferencë për mediat, Kryemadhi vuri në dukje se mazhoranca duhet ta dorëzonte menjëherë Tahirin para drejtësisë. Sipas saj, kryeministri Rama është duke i bërë shantazh drejtësisë. Ndërsa kërkoi që kreu i Policisë së Shtetit Haki Çako dhe vetë kreu i qeverisë duhet të japin dorëheqjen sa më parë.
“Kjo duhej të ishte mbledhja më e shkurtër në histori. Mazhoranca duhet ta dorëzonte menjëherë Tahirin para drejtësisë. I bëj thirrje Ramës të heqë dorë nga shantazhet që po i bën organit të prokurorisë. Është fare e qartë se ky kryeministër dhe mazhoranca kanë ngrënë çorbën e prishur. Çako dhe Rama vazhojnë të qëndrojnë në krye të qeverisë dhe policisë së kapur nga trafikantët. Rama të heqë dorë nga shantazhet ndaj drejtësisë. Le t’i lërë të bëjë punën e tyre”, u shpreh Kryemadhi.
