Kryetarja e LSI, Monika Kryemadhi ka reaguar pas fjalëve të Ramës se “opozita do të shkojë për skrap”.
Në një lidhje direket me emisionin “Të paekspozuarit”, Kryemadhi tha se Rama është një njeri pervers, dhe këtë gjë, sipas saj e dëshmojnë edhe miqtë e tij më të afërt, ndërsa shtoi se ai po e çon Shqipërinë për skrap.
“Rama po shkatërron Shqipërinë, po çon për skrap vendin. Rama ku ka vënë dorë është si shenjtani që djeg gjithçka ku shkel. Rama përdor fjalor pervers dhe banal. Rama është një njeri pervers dhe këtë e dëshmojnë edhe miqtë e tij më të afërt. Ai mbush sheshet me administratën, ndërsa opozita ka pas vetes popullin”, tha Kryemadhi.
Gjithashtu, Kryemadhi foli dhe për gjendje e vështirë në të cilën ndodhen sot shqiptarët, duke thënë se ka qenë në Dibër dhe ka parë nga afër situatën dramatike në të cilën ndodhet vendi.
“Unë isha në Malësi, në Dibër, në zonën e Kalasë së Dodës dhe fshatrat e tjerë përreth. Mund të them se nga vëzhgimi dhe fjalosja me njerëzit, rezulton se ata janë pesimistë për realitetin shqiptar. Ndërsa të rinjtë kanë ikur, e kanë braktisur masivisht vendin. Dhe kanë ikur kaq shumë sa në atë zonë vetëm një djalë të ri 21 vjeç takova. Edhe ai më tha se po pret sa t’i kalojë periudha e ekspulsit dhe do ikte në Itali”, deklaroi Kryemadhi.
