Kryetarja e LSI-së, Monika Kryemadhi ka reaguar në lidhje me pasojat e rënda që la tërmeti prej 6.4 ballësh që goditi vendin.
Përmes një postimi në Facebook, Kryemadhi tha se tërmeti i fuqishëm ka vrarë të gjithë shoqërinë tonë. Kryemadhi kërkon nga qeveria që të përqendrohet në shërbimin ndaj njerëzve dhe të lërë pas fjalimet dhe shfaqjet mediatike.
Postimi i plotë:
Mes dhembjes së pamatë sot në ditën e zisë kombëtare, i lutem Zotit me besim dhe shpresë për të shpëtuar jetën e cilitdo që gjendet ende nën rrënojat e tërmetit shkatërrimtar. I lutem Zotit t’iu japë forcë dhe ngushëllim të gjithë atyre që kanë humbur njerëzit e tyre të dashur, që ta përballojnë dhembjen e madhe.Sot më shumë se kurrë duhet të gjejmë forcë me besim në Zot dhe me dashuri pranë njëri-tjetrit, sepse tërmeti na ka vrarë të gjithëve, por forca e dashurisë për njëri-tjetrin na bën më të fortë! Lus Zotin ti japë forcë dhe arsye qeverisë, që të kuptojë se shërbimi ndaj të gjithë njerëzve të prekur nga pasojat e tërmetit, është më i rëndësishëm se fjalimet dhe shfaqjet mediatike. Solidariteti dhe dashuria është forca jonë!
