Kryetarja e LSI-së, Monika Kryemadhi ka hedhur akuza ndaj kryeministri Rama se po e mban Shqipërinë larg Evropës.
Sipas saj, vendimi i parlamentit holandez tregon dështimin e qeverisë shqiptare, ndërsa thotë se Shqipëria është baza operacionale e organizatave të krimit të organizuar.
“Ashtu siç e ka theksuar dhe raporti i DASH, Shqipëria është baza operacionale e organizatave të krimit të organizuar.
Jo djegia e mandateve, apo protestat e opozitës krijojnë këtë problem, por janë kriteret e paplotësuara nga keqqeverisja e Edi Ramës, nga keqqeverisja e tij. Nga dështimi i institucioneve shqiptare për të bashkëpunuar me institucionet e rendit në Europë dhe për të krijuar kredibilitetin e duhur për konsolidimin e progresit me rezultate të prekshme dhe konkrete në luftën kundër korrupsionit dhe krimit të organizuar”, deklaroi Kryemadhi.
Ndër të tjera, ajo shprehet se vendi ka nevojë për një politikë që të mund ta drejtojë atë drejt perëndimit, teksa shton se për qytetarët vendimi për të mbajtur larg Shqipërinë nga Evropa, do të ishte “izolim” dhe mungesë shprese për brezin e ri.
“Përpos mesazheve të shumta nga partnerët ndërkombëtarë për të mos e marrë të mirëqenë çeljen e negociatave në qershor, mosveprimi për marrje masash nga ana e qeverise shqiptare dëshmon qartë zgjedhjen me vetëdije të Rilindjes për ta mbajtur vendin larg nga Europa duke i hequr shansin historik të çeljes se bisedimeve për anëtarësim në muajin qershor.
Për qytetarët shqiptarë ky vendim do të thotë IZOLIM, mungesë të theksuar të investimeve të huaja që mund të krijojnë punësim e mirëqenie, do të thotë mungesë shprese për brezin e ri që kaq shumë i duhet vendit tonë në këto momente të thella krize”, tha kryetarja e LSI.
