Delegacioni i PE në Shqipëri tashmë ka nisur takimet me liderët politikë, referuar situatës aktuale politike në vend, me opozitën që ka djegur mandatet dhe me valën e protestave kundër qeverisë për të kërkuar zgjedhje të parakoshme.
Po kështu, në fokus të qëllimit të vizitës së tyre është edhe njohja me procesin e reformave, në prag të vendimit për negociatat që do të jepet në qershor.
Pak çaste më parë, krerët e partive të opozitës së bashkuar dhanë mesazhe të qarta, pas takimit që zhvilluan me grupin e eurodeputetëve që kanë mbërritur në Tiranë për një vizitë dy ditore.
Kryetarja e LSI-së, Monika Kryemadhi, deklaroi se opozita nuk do të bëjë asnjë hap pas, dhe se rruga që po ndjek është ajo e duhura.
“Opozita nuk do të ketë asnjë hap pas. Shqiptarët janë mandatet tona më të pastra. Protesta e 16 shkurtit, protesta e 21 shkurtit dhe protesta e djeshme tregoi edhe njëherë se opozita është në rrugën e duhur.
Jam e bindur që edhe të gjithë ju gazetarët e terrenit, jeni në rrugën e duhur që e paraqisni opozitën çdo moment prezent në aktivitetet e saj.
Na falni për gazin helmues të djeshëm që përdori Garda e Republikës kundër qytetarëve dhe kundër jush. Gjëra të bukura do të vinë për shqiptarët”, përfundoi ajo.
