Kryemadhi kujton djegien e mandateve: Ishte një nga vendimet më të mira

Kryetarja e LSI-së, Monika Kryemadhi gjatë një takimi me banorët e Laprakës tha se ndryshimi tashmë ka ardhur, ndërsa theksoi se më 25 prill qytetarët do ta votojnë.

Ajo foli rreth djegies së mandateve dy vite më parë, ku theksoi se vendimi pati një kosto për Shqipërinë dhe politikën, por sipas saj ka qenë i duhuri pasi tregoi se LSI nuk ishte për karriget, por kishte dinjitet.

Monika Kryemadhi: “Ndryshimi ka ardhur. Është në të gjithë Shqipërinë. Të dashur miq nga sot ne kemi edhe 9 ditë të tjera. 9 ditë që do të jenë të forta, energjike, të cilat na çojnë drejt fitores. Me 25 prill, ju do të votoni numrin 6 dhe unë jam krenare që me qindra dhe mijëra të rinj e të reja, jo vetëm në Tiranë, por në të gjithë Shqipërinë, dalin dhe më presin me makina dhe flamuj, pa pasur pikë presioni. Deklarohen hapur. Kjo është kënaqësia ime më e madhe. Kjo mbështetje që i jepni LSI nuk është thjesht një entuziazëm për secilin nga ne, por është detyrim i madh që nga unë e para dhe nga deputetet e LSI-së duhet të kenë ndaj rinisë shqiptare për të realizuar pikë për pikë çdo detyrim tonin për qytetarët shqiptarë, me 5 prioritet tona.”