Kryetarja e LSI, Monika Kryemadhi, i ka shkuar sot në zyrë presidentit Meta për të propozuar datën e zgjedhjeve të 2021. Ajo zbuloi para mediave se si kryetare e LSI-së, ka dashur që zgjedhjet të zhvilloheshin para dy vitesh. Kreu i qeverisë Edi Rama u shpreh se është i gatshëm që zgjedhjet të mbahen në çfarë datë që të dëshirojnë, përveç datës 2 maj që janë Pashkët ortodokse. E ndërsa Kryemadhi tha se duhet një datë zgjedhjesh që të lëvizin gjërat. Sipas saj, sa më shpejt zgjedhjet, aq më mirë.
“Dua të theksoj që si kryetare e LSI, kam dashur që zgjedhjet të zhvilloheshin para dy vitesh. Nuk është çështje date, por duhen zgjedhje të lira dhe të ndershme. I bëmë të qartë presidentit se LSI-ja do të zbatojë çdo vendim të presidentit që është kushtetues dhe do marrim pjesë në çdo proces zgjedhor.
Unë mendoj që sot takimi ishte vetëm për datën e zgjedhjeve. Është e rëndësishme që shqiptarëve t’u japësh një datë. Çdo detaj i vogël, është vetëm vonesë dhe të tallesh me qytetarët.
Duhet të jepet një datë zgjedhjesh, që të lëvizin gjërat. Prandaj sa më shpejt zgjedhjet, aq më mirë. Duhet një përmbysje e një sistemi të kaluar, dhe krijimi i një sistemi të ri”.
