Kryetarja e LSI-së, Monika Kryemadhi shprehet se me paketën anti-shpifje, kryeministri Edi Rama po dënon çdo qytetarë që kërkon të informohet, si dhe çdo portal që denoncon grabitjet e qeverisë.
Përmes një deklarate për shtyp, Kryemadhi theksoi se ky projektligj bie në kundërshtim me paketën ndërkombëtare për lirinë e medias.
“Paketa Anti-shpifje duhet të quhet paketa Anti-shprehje. Edi Rama po dënon çdo qytetar që kërkon të informohet për shtëpinë e tij, nëse ajo është ose jo e banueshme pas tërmetit.
Edi Rama po dënon çdo qytetare që kërkon të informohet për sigurinë e jetës së saj pas tragjedisë.
Edi Rama po denon çdo portal apo drejtues portal që denoncon grabitjen dhe mashtimet e tij të pafundme.
Edi Rama po dënon çdo politikan që denoncon trafikun e tij.
Edi Rama është në kundërshtim me paketën ndërkombëtare per lirinë e medias.
Sot qytetarët janë të gjithë së bashku sepse Edi Rama dhe oligarkët e tij nuk kanë të ngopur. Ne jemi me gazetarët, me mediat dhe lirinë e fjalës. Të pengosh fjalën është diktaturë e ky është fundi i Ramës. Kjo bën dhe dallim nga qytetarët e lirë dhe skllevërit”, tha Kryemadhi.
