Kryetarja e LSI, Monika Kryemadhi, ka zhvilluar një takim me strukturat e partisë që drejton në Durrës. Ajo tha se muaji korrik dhe gusht nuk do të jenë muaj pushimi, por punë e plotë për zgjedhjet. Po kështu, kryetarja e LSI-së ka komentuar edhe Komisionin Qëndror të Zgjedhjeve, ku e ka cilësuar qesharake, pasi nuk kanë ende një rezultat zgjedhjesh.
“Sot kemi një KQZ qesharake, ende nuk ka një rezultat zgjedhjesh. Çdo ditë e kësaj qeverie në pushtet, thellon varfërinë dhe skamjen e shqiptarëve.
Çdo ditë në pushtet e Edit, shoqërohet me një mega korrupsion. Në një javë dy skandale që e rrisin çmimin e naftës me 25 lekë për litër. Askush të mos mendojë që mund të gëzojë djersën, mundin dhe gjakun e shqiptarëve me kontrata korruptive.
Bujqësia drejt kolapsit, dhe pa këtë rritje të frikshme të naftës. Rritja e çmimit të naftës nga dy aferat korruptive të Ramës do prekin jo vetëm xhepat e shqiptarëve, por do kenë edhe pasoja negative në gjithë ekonominë.
Për dy oligarkë, do dëmtohen dhjetra eksportues dhe mijëra prodhues në bujqësi. Jemi në këtë betejë për të zhbërë të keqen që ka çuar në 35% numrin e qytetarëve që jetojnë nën minimumin e varferisë. Investimet e huaja janë bërë si përrallë nga e kaluara”, tha Kryemadhi.
