Kryetarja e LSI, Monika Kryemadhi, është kundërpërgjigjur pas komenteve thumbuese të kryeministrit Rama sot në Prrenjas, për kryebashkiaken Miranda Rira. Kjo e fundit është bërë nënë disa ditë më parë, ndërsa Rama teksa e uroi, nuk hezitoi edhe ta thumbonte. “Kam besim dhe bindje që do t’i krijojmë mundësinë Mirandës, që të fokusohet më shumë te bebja pas 30 qershorit”, tha Rama.
Ndërkohë, Kryemadhi e cilëson këtë mungesë respekti nga ana e kryeministrit, që sipas saj, gjithnjë i ka keqpërdorur gratë. Po kështu, Kryemadhi thekson se kjo përbuzje ndaj grave, vjen për shkak të formimit të tij. “Duke harruar se vajzat dhe gratë shqiptare nuk janë ato që Edi Rama mendon, apo përdor si struktura eskorte, nuk janë ato që presin që jetën dhe karrierën tua ndërtojë ekipi i Rilindjes”. Më tej ajo shton se gratë shqiptare janë dinjiteti i shoqërisë dhe forca e familjes.
Reagimi i plotë:
Me perversitetin që e karakterizon, me pasionin për të poshtëruar gratë dhe vajzat që nuk i binden dëshirave dhe presionit të tij, Edi Rama ka guxuar paturpësisht të përflasë edhe Kryetaren e Bashkisë Prrenjas, e cila sapo është bërë nënë për herë të dytë.
Miranda Rira ka pak ditë që është bërë nënë, por as në fjalosjet më banale shqiptare, as në kohët më të vështira, si asnjëherë kryeministri ka përfolur një grua që sapo është bërë nënë.
Kjo ndodh jo vetëm për mungesën e respektit që ai ka për gratë e vajzat në përgjithësi, as për ato që në veçanti i shërbejnë dhe nuk guxojnë ti kthejnë fjalë, nuk ndodh as sepse ai përdor çdo gjë për të prodhuar lajm e për të tërhequr vëmendjen nga kriza.
E gjithë kjo përbuzje për gratë vjen prej formimit të tij, prej mënyrës si e ka ndërtuar jetën dhe karrierën, ku gratë kanë qenë të keqpërdorura prej tij. Duke harruar se vajzat dhe gratë shqiptare nuk janë ato që Edi Rama mendon apo përdor si struktura eskorte, nuk janë ato që presin që jetën dhe karrierën tua ndërtojë ekipi i Rilindjes.
Vajzat dhe gratë shqiptare janë dinjiteti i shoqërisë dhe forca e familjes. Janë ato që sot më shumë se kurrë e kuptojnë dhe luftojnë për një jetë më të mirë për veten dhe familjen, dhe për më shumë dinjitet në një shoqëri të marrë peng nga qeverisja e bandave.
Shqipëria, shtëpia juaj!”.
