Kryetarja e re e Lëvizjes Socialiste për Integrim, Monika Kryemadhi në fjalimin që mbajti në konventën e LSI-së tha se do ta çojë “Rilindjen” për skrap. Gjithashtu Kryemadhi kërkoi falje për katër vitet e bashkëqeverisjes me PS-në.
“Shumica e shqiptarëve përcaktuan opozitën e Shqipërisë. Bandat shpërthyen në 25 qershor. Do të jemi një forcë udhëheqëse opozitare, do ta çojmë për skrap qeverinë e krimit të organizuar dhe shitblerjen e votave. Njerëzit e LSI-së janë heronj sepse përballuan edhe kërcënimin e fëmijëve të tij maturantë. Po ne i themi Ramës se do ta çojmë “Rilindjen” për skrap. Dua t’ju kërkoi falje për bashkëqeverisjen me Rilindje. Duhet të kërkojmë falje që nuk folëm aq sa duhet kur Shqipëria po jepej e gjitha me koncesion. Duam të kërkojmë falje që nuk patë zë aq të fortë për të ndaluar qeverinë të mos vazhdonte me tutje me shkatërrimin e Shqipërisë. Gjithçka duhet ta nisim nga vetja. Mbi 20 mandate të LSI-së u tjetërsuan. Ne ishim kundër ligjit të plehrave dhe kundër kapjes së Shqipërisë nga oligarkët. Do të jetë një rrugë e gjatë por nuk do të ketë kurrë kthim pas”, tha Kryemadhi.