Kryetarja e LSI-së Monika Kryemadhi u shpreh se familja shqiptare është një vlerë e jashtëzakonshme, e për këtë arsye, sipas saj, kombi ynë është më i fuqishëm.
Gjatë fjalës së saj në Festivalin e Paqes dhe të Familjes, Kryemadhi shtoi se për fat të keq, qeverisja e sotme i ka “mbytur” familjet shqiptare në varfëri.
“Kemi mijëra shqiptarë të braktisur në Itali, në Francë etj. Kjo është një këmbanë alarmi për të gjithë ne. Sot edhe familjet që jetojnë me biznese të tyre të vogla, sa vijnë e shkatërrohen, sepse qeveria mbështet vetëm të pasurit. Familjet shqiptare janë në kufijtë e mbijetesës, për shkak të qeverisë”, deklaroi kryetarja e LSI-së.
Por pavarësisht problemeve të shumta në familje që vijnë nga “keqqeverisja”, Kryemadhi theksoi se ata qëndrojnë sërish bashkë për shkak të dashurisë së fuqishme që kanë për familjen.
Pjesë nga fjala e Kryemadhit:
Njerëzit kanë nevojë për paqe dhe familje. Kjo sepse dashuria e respekti nis në familje. Ne kemi në dispozicionin tonë familjen, duke ia dhënë respektin që meriton. Duhen dashur familjet e thjeshta, nëse duam që gjithë njerëzimi të jetë një familje. Ky është një aktivitet për një përkushtim ndaj familjes së bashkuar, për besim e kulturë për fëmijët shqiptarë, për të pasur një komb të fortë. Tradita e fortë shqiptare me një familje të fuqishme ka bërë që kombi ynë të jetë më i fuqishëm. Familja shqiptare është një vlerë e jashtëzakonshme.
Një familje e fortë prodhon një shoqëri të fortë. Edhe pse sot pensionistët nuk mund të jetojnë dot me aq sa marrin, edhe pse shqiptarët përballen me probleme të shumta, ata sërish rrinë bashkë si shkak i familjes tepër të fuqishme. Sot në kohën e globalizmit, kemi burra e gra shqiptarë të martuar me të huaj. Ajo që më bën përshtypje është se gjuha, zakonet dhe traditat trashëgohen. Sot familja shqiptare po trazohet. Sot kemi të rinj shqiptarë që kanë ikur jashtë. Kemi mijëra shqiptarë të braktisur në Itali, në Francë etj. Kjo është një këmbanë alarmi për të gjithë ne. Sot edhe familjet që jetojnë me biznese të tyre të vogla, sa vijnë e shkatërrohen, sepse qeveria mbështet vetëm të pasurit. Familjet shqiptare janë në kufijtë e mbijetesës, për shkak të qeverisë.
