Alqi Bllako nuk e priti mbledhjen e Këshillit të Mandateve, por dorëzoi mandatin e deputetit dy orë para mbledhjes. Këtë akt, kryetarja e LSI-së, Monika Kryemadhi e ka cilësuar si një pranim të gjykimit të shkurtuar nga Bllako. Në “A2 CNN”, Kryemadhi tha se çështja e inceneratorëve ka vënë në provë SPAK-un, por arrestimet e deritanishme, sipas saj, nuk tregojnë asgjë. Ajo shtoi më tej se SPAK dhe Reforma në Drejtësi janë në provë. “Vërtet mund të arrestosh Bllakon, por ai është një instrument i flakur nga Rama, ndërsa inceneratorët vijojnë të paguhen, të marrin para nga buxheti i shtetit”, përfundoi Kryemadhi.
“Procesi i dorëzimit të mandatit ishte një “gjykim i shkurtuar” nga vetë Bllako, sepse në hyrjen e një Komisioni të Verifikimit të Mandateve do të shtoheshin akuzat. Unë do të merresha me Veliajn, me Ramën dhe jo me Bllakon, nëse do të kishte debat.
Megjithatë, rasti Bllako dhe Koka duhet të ishin bërë më parë. Sa herë Rama dhe qeveria janë në vështirësi i hedhin një “kockë” opinionit publik. Çështja e Bllakos dhe arrestimet e tjera, po të ishin kaq serioze, gjëja e parë do të ishte arrestimi i Zotos, i Mërtirit, Gugallja. SPAK dhe Reforma në Drejtësi janë në provë. Vërtet mund të arrestosh Bllakon, por ai është një instrument i flakur nga Rama, ndërsa inceneratorët vijojnë të paguhen, të marrin para nga buxheti i shtetit”, tha Kryemadhi.
Kuvendi i Shqipërisë i ka hapur rrugë arrestimit të Alqi Bllakos. Përmes një letre zyrtare, Kuvendi informon SPAK se anulimi i mbledhjes së Këshillit të Mandateve për Rregulloren dhe Imunitetin u anulua, pas dorëzimit të mandatit nga Alqi Bllako.
Kuvendi informon se Alqi Bllako tashmë është pa imunitet, pasi mandati i një deputeti mbaron kur ai dorëzon mandatin.
“Në mbështetje të Urdhrit nr. 24, datë 30.03.2022, të Kryetares së Kuvendit, znj. Lindita Nikolla “Për anulimin e mbledhjes së Këshillit për Rregulloren, Mandatet dhe Imunitetin”, mbledhja e Këshillit nuk do të zhvillohet.
Deputeti Alqi Bllako ka depozituar në Kuvend deklaratën për heqjen dore nga mandati i deputetit me vullnet dhe për rrjedhojë Kuvendi nuk mund të vazhdojë procedurat për shqyrtimin e kërkesës së Prokurorisë së Posaçme Kundër Korrupsionit dhe Krimit të Organizuar për dhënien e autorizimit për arrestimin e deputetit Alqi Bllako”, thuhet në njoftimin e Kuvendit.
