Çështja e detit mes Shqipërisë dhe Greqisë vijon të jetë në mes të konsultimeve. Ministri i Jashtëm grek, Nikos Dendias, i pyetur në një intervistë të dhënë gjatë kësaj të shtune për gazetën “Parapolitika”, me gazetarin Kostas Papahliminxhos, për ecurinë e bisedimeve me Shqipërinë, nënshkrimin e një peticioni të përbashkët, e për një apel në Gjykatën Ndërkombëtare të Drejtësisë në Hagë dhe sa afër janë dy vendet me marrëveshjen, ministri i Jashtëm Dendias tha se komisionet teknike vijojnë bisedimet.
“Marrëveshja politike për referimin e çështjes së delimitimit të Zonës Ekskluzive Ekonomike midis Greqisë dhe Shqipërisë në Gjykatën Ndërkombëtare të Drejtësisë në Hagë, është arritur nga tetori i kaluar. Përsa i përket çështjeve teknike, duhet hartuar dhe kërkesa përkatëse. Organet kompetente të të dy vendeve vijojnë konsultimet për hartimin e këtij teksti”, tha Dendias.
Në lidhje me ratifikimin e pakteve me Maqedoninë Veriore, pas marrëveshjes së Prespës, Dendias ka deklaruar se Ministria e Jashtme ka dorëzuar dosjen e plotë në Parlamentin grek në shtator 2020, tashmë mbetet përcaktimi i datave për seancat parlamentare, duke shtuar se pandemia ka ndryshuar ndjeshëm programin e Kuvendit.
