Kryetari i Bashkisë së Kukësit, Bashkim Shehu i ka bërë thirrje Ramës që të lirojë sa më para protestuesit, në të kundërt nuk do të shkojë nesër në takim me Kryeministrin. Deklaratën ai e bëri gjatë një konference për shtyp teksa protestuesit kanë rrethuar komisariatin e qytetit.
“Ka edhe brenda protestuesve socialistë të ndershëm. Nuk bëhet kjo punë me përjashtime. Duhet të ulet me qytetarët. Unë nuk kam pse largohem asnjë minutë nga Kukësi. Nëse Qeveria do të dëgjojë qytetarët e Kukësit le të vijë përmes institucioneve dhe të komunikojë me qytetarët. Unë nuk shkoj në takim me kryeministrin nëse nuk lirohen protestuesit”, tha Shehu.
Sipas tij “unë e kam deklaruar se nuk jam kundër taksës. Sa kohë që qytetarët e mi ndihen keq, unë përfaqësoj vetëm ata. Bashkim Shehu bëhet pjesë e çdo proteste që organizon PD, qytetarët e Kukësit apo shoqëria civile”.
Më tej ai është shprehur se: “Unë i bëj shkresë kryeministrit, ministrave, u bëj thirrje që të ulen dhe të negociojnë. Kryeministrit Rama i kam kërkuar që në vitin 2016 për të bërë trasnaparente kontratën. Brenda ka protestues, njerëz të ndershëm, socialistë të ndershëm, dhe kjo çështje nuk bëhen me arrestime. Ndaj hetimi duhet të jetë transparent dhe qytetarët të lirohen”.
