Kryetari i Bashkisë së Vorës, Agim Kajmaku, ka hedhur poshtë në mënyrë kategorike pretendimet e PD-së, se është i dënuar dhe i dëbuar nga shteti grek. Në një reagim për Shqiptarja.com, ai shprehet se ka udhëtuar lirisht në çdo vend të BE, kjo edhe për shkak të biznesit të tij.
Ai konfirmon se nuk është dënuar dhe as dëbuar nga Greqia, dhe se ka qënë udhëtues i shpeshtë dhe korrekt në shumë vende të BE-së. Po kështu, Agim Kajmaku paralajmëron të gjithë ata që shpifin kundrejt emrit të tij. Duke qëndruar në të njëjtën linjë, kryetari i Bashkisë së Vorës shton më tej se ata që shpifin, do të vihen përballë drejtësisë.
“Sapo jam njohur me një tekst letre të publikuar nga PD, ku pretendohet se unë jam dënuar dhe dëbuar nga shteti grek. Me përgjegjësi ligjore dhe bindje morale deklaroj se nuk jam dënuar dhe as jam dëbuar asnjëherë nga ndonjë shtet i BE, as nga Greqia.
Ndërkohë që për vite të tëra kam qenë udhëtues i shpeshtë dhe korrekt në shumë vende të BE, për llogari të biznesit tim familjar. Autorët dhe akuzuesit publik që shpifin ndaj personit tim, për një qëllim të vetëm, atë të ndotjes politike të kundërshtarit, do të vihen përballë drejtësisë dhe detyrimit të gjetjes së provave të pretenduara. Por ju drejtohem se të paqenën nuk mund ta pretendosh si të ndodhur”, shprehet kryebashkiaku i Vorës.
