Kryeministri Edi Rama ka zhvilluar sot një takim me përfaqësues të shoqatës së transportit, për të prezantuar Paketën e Rezistencës Sociale, për këtë kategori. Kreu i qeverisë pohoi se qeveria do të japë 500 milionë lekë për kompensimin e rritjes së çmimit të biletës në transportin urban qytetës dhe ndërqytetës, që qytetarët përdorues të këtij transporti të mos preken financiarisht nga pasoja e luftës mbi çmimin e karburantit.
“Masa tjetër e mos prekjes së taksave të natës kërkon ndërhyrje për ata që përdorin transportin publik. Dhe me një rritje të çmimit të biletës, që do të ishte e padëshirueshme për publikun dhe do ti cënonte prapë së prapë kapacitet tuaj për të rezistuar do të ishte i dobët. Dhe për këtë arsye ne vendosëm 500 milion lekë për të suportuar diferencën dhe për t’ju kërkuar juve që të mos prekni në këtë fazë kaq delikate çmimin e biletës.
Është shumë e rëndësishme që të vazhdojë shërbimi. Teksa po vija këtu, pashë që agjencia ndërkombëtare e energjisë kishte dalë me një lajm, që nuk është pozitiv, që problemi në këtë situatë nuk është kaq sa duket. Sepse ndërkohë që diskutojmë çmimet, rreziku me naftën apo energjinë është mungesa. Ka paralajmëruar mundësinë e shokut më të madh të furnizimit me naftë në dekada”, tha Rama.
Kryeministri Edi Rama ka paralajmëruar se dita e hënë mund të bëhet pa makina. Ai shtoi se mund të mendohen dhe mundësi të tjera, si tre ditë pa shkuar në punë.
“Problemi në këtë situatë nuk është kaq sa duket, se ndërkohë që ne diskutojmë mësimet, këtu rreziku me naftën apo me energjinë është mungesa. Sot është paralajmëruar mundësia e shokut më të madh me furnizmin me naftë në dekada. Ajo të cilës i referohen është kriza e 1974 ku ne nuk ishim pjesë e botës. Agjensia ka nxjerrë një plan me 10 pika ku janë dy gjëra që ne i kishim diskutuar mes nesh. Do bëjmë një tjetër mbledhje ku do të vendosim ditën e hënë pa makina, ose flasim tre ditë mos vajtje në punë, jo për shkak të infeksioneve por për shkak të kursimit. Kjo është situata”, u shpreh më tej ai.
