Ish-presidenti i vendit, Alfred Moisiu është shprehur se Ilir Meta e ka për detyrë kushtetuese që të marrë dhe të ulë palët në tavolinë.
I ftuar mbrëmjen e sotme në “Provokacija”, Moisiu, teksa po fliste për kizën politike, theksoi se zgjidhja e vetme është një dialog mes palëve para zgjedhjeve të 30 qershorit.
“Unë e kam kaluar këtë fazë në 2007 dhe gjykoj se i dhashë zgjidhje kësaj pune. Në atë kohë unë bëra detyrën time dhe në zgjidhje mori pjesë gjithë klasa politike, por u zgjidh. Unë them që nuk ka krizë që nuk ka zgjidhej. Kushtetuta e detyron Presidentin, dhe Presidenti është për të për të përfaqësuar unitetin e popullit. E ka detyrë kushtetuese Presidenti”, u shpreh Moisiu.
Ndërkohë, sa i përket vendimit të opozitës për djegien e mandateve, ish-presidenti e ka konsideruar “vetëvrasje politike”.
“Por kjo është një vetëvrasje politike e asaj pjese politike që e ndërmori këtë punë. Por tani duhet sinqeritet dhe vullnet për ta zgjidhur. Tani kjo pse nuk mund të hyjë më në Parlament dhe kjo gjë dihet. Por zgjedhjet vendore janë një provë dhe duhet një dialog para zgjedhje vendore që të përgatitet dhe të marrë pjesë në zgjedhjet vendore dhe them se mund të ketë rezultat nëse duan sigurisht. Nëse nuk duan dhe duan destabilizim atëherë dalim tek një fjalë e vjet që thotë “ujku do mjegull”, deklaroi Moisiu.
