Qeveria shqiptare ka hartuar në plan për kursimin e energjisë. Plani i hartuar nga Ministria e Energjetikës do të diskutohet sot me ekspertët e fushës, ndërsa pritet të miratohet nesër në mbledhjen e qeverisë.
Ky plan parashikon kufizim e energjisë në institucionet shtetërore me një përqindje që ende nuk është përcaktuar, bëjnë me dije burime për Televizionin Klan.
Për secilin institucion publik do të shihet mesatarja e energjisë së konsumuar në një muaj për vitin e shkuar, dhe nëse kjo masë nuk është reduktuar në një përqindje të caktuar, atëherë ndaj institucionit do të ketë penalitete.
Gjithashtu plani parashikon edhe kufizimin me vendim qeverie të ndriçimit publik në rrugë, dhe nëpër zbukurime ndërtesash publike.
Pjesë e tij është edhe kufizimi i ndriçimit të reklamave pas një orari të caktuar gjatë natës. Gjithashtu Ministria e Energjetikës ka parashikuar që për të shtuar burimet energjetike në vend, dhe për të ulur harxhimin e energjisë së rrjetit, të subvencionojë të gjitha ata abonentë që do të vendosin panele diellore për ngrohjen e ujit apo edhe për ndriçimin në ambientet e brendshme.
Deputeti socialist, Erion Braçe tha sot në Komisionin e Ekonomisë, se qeveria duhet të shpallë sa më shpejt të jetë e mundur planin e kursimit të energjisë.
“Padyshim që kemi detyrim furnizimin me energji, por duhet të llogaritet çdo qindarkë për të garantuar energjinë, por është e domosdoshme një plan kursimi që ende nuk është i qartë. Të kursesh nuk është as tallje dhe as komunizëm, por jetike. Qeveria duhet të shpallë një plan kursimi për institucionet publike, gjithë Evropa po e bën vetëm ne bëjmë harakirin me energjinë. Zgjohuni në 5 të mëngjesit dhe shikoni se çfarë ndriçon kot. Shumë mirë që keni dhënë 28 miliardë lekë për energjinë elektrike, por ka ardhur koha që kush e do energjinë elektrike për luks duhet ta paguajë më tepër dhe jo sa një pensionist. Kjo nuk shkon më. Ka muaj që e thoni po nuk shkon më.
Paketa sociale më shqetëson pafund kjo gjë. Paketa sociale duhet të kishte dalë, sepse akti normativ që ka dalë që në korrik. Imagjinoni një çift pensionistësh që marrin 22 mijë lekë, imagjinoni familjet me ndihmë ekonomike që shkon maksimumi 36-52 mijë lekë të vjetra. Këta njerëz i kanë sytë vetëm tek paketa sociale, nuk i kanë gjëkund tjetër”.
Në datën 1 tetor faturimi i energjisë elektrike nuk do të jetë i njëjtë për të gjithë, si aktualisht me 9.5 lekë për kilovat. Këtë dimër, faturimi do të bëhet me fasha, kush shpenzon mbi 800 kilovat do të paguajë më shtrenjtë. Nën këtë vlerë do paguhet 9.5 lekë/kilovat.
