Duket se festa e Krishtlindjes ka qetësuar klimën politike në vend. Një ditë më parë, Rama drekoi me një familje nga qyteti i Laçit. Ai foli për planet e qeverisë për vitin 2020. Kryeministri i tregoi familjes me 6 pjesëtarë në fshatin Gjorm, se në Laç do të financojë shteti turk. “Dua të uroj gëzuar Krishtlindjen të gjithëve, pa dallim feje se i festojmë të gjithë.
Edhe Krishtlindjen edhe Bajramin e festojmë të gjithë. Një urim sidomos për të prekurit nga tërmeti. Vitin tjetër Krishtlindjet iu gjejnë në shtëpinë e re. Do të ngrihen komplekse, me projekt, ku do të strehohen të gjithë ata që janë prekur nga tërmeti. Do të bëhet Laçi qytet mjaft interesant.
Unë e kam parë projektin. Do e bëjnë këta të Turqisë, ato 500 apartamentet. Kjo është zona e studiuar. Këtu janë projektet. Kjo është një godinë. Është kryevepër, është fantastike. Kap edhe pjesën e spitalit. Do prishen të gjithë ato konviktet. Do bëhet Laçi një qytet model.
Shpresa ime është që në fillim të pranverës do të nisim punën. Ata që kanë shtëpi individuale, do të sistemohen avash-avash. Ne do të rindërtojmë Laçin për një vit, për shkak se është në volum më të vogël. Ndërsa Durrësi është më i madh, do na duhet më tepër kohë, por do i bëjmë edhe ato”, tha Rama.
Nga ana tjetër, kreu i PD-së, Lulzim Basha përcolli një urim ndaj të gjithë besimtarëve të krishterë nga Kisha Ortodokse në Durrës, dhe më pas nga kisha e Shën Mhillit në Laç dhe ajo e Shna Ndout. Nga Durrësi, Basha i bëri thirrje palëve të tjera të politikës të bashkohen për të udhëhequr vendin. “Nga kisha e Shën Palit uroj besimtarët e Durrësit dhe gjithë Shqipërisë Krishtlindje të gëzuara! Në veçanti mendimet dhe lutjet e mia janë me të goditurit nga tërmeti i 26 nëntorit. Qoftë kjo festë, kjo ditë e shenjtë e lindjes së Krishtit një thirrje për bashkim më të madh, më të fuqishëm. Si një familje për të përballuar çdo të keqe dhe për të dalë në dritën e begatimit të Zotit. Gëzuar! Zoti e bekoftë Shqipërinë”, tha Basha.
