Ditën e djeshme, Drejtoresha e Byrosë për Çështjet Ndërkombëtare të Zbatimit të Ligjit dhe Luftës ndaj Drogës në Ambasadën e Shteteve të Bashkuara Julie Craven, ka pasur një takim me Drejtorin e Burgjeve, Agim Ismaili.
Një nga pikat e diskutimit në takim mësohet se ka qenë trajtimi nëpër burgje i kriminelëve VIP. Pas takimit, ambasada e SHBA-së nëpërmjet një statusi në facebook ka dhënë detaje nga takimi.
Në postimin e ambasadës thuhet se SHBA-ja ka bërë një investim fillestar prej 920,000 dollarë dhe se do të ndërtohen programe që shënjestrojnë burgjet ku mbahen disa prej kriminelëve më të mëdhenj të vendit.
Gjatë takimit, Craven ka dhënë mbështetjen maksimale për reformën në burgje në Shqipëri. Investimi i SHBA-së synon të forcojë aftësinë e personelit të burgjeve për të ndalur dhe shkatërruar aktivitetin e paligjshëm pas hekurave.
