Ngjarjet e bujshme kriminale në vend, të cilat ende nuk kanë një autor, kanë vënë në lëvizje ministrin Lleshaj. Ai u ka përcjellë urdhrin e prerë drejtuesve të policisë, për të mos dhënë asnjë detaj për mediat. Më konkretisht, Ministria e Brendshme iu kërkon drejtuesve të policisë të mos lejojnë daljen e materialeve hetimore për ngjarje të ndryshme kriminale, duke iu referuar dy vrasjeve në Rrëshen dhe Paskuqan të ditëve të fundit.
Në urdhrin e ministrit të Brendshëm, Sandër Lleshaj, thuhet se këto materiale përbëjnë sekret hetimor.
“Përshëndetje të nderuar shefa Komisariatesh dhe sektorësh. Marr shkas nga dalja në media të materialeve procedurale si në rastin e vrasjes në Rrëshen dhe vrasjes në Paskuqan, ku dalin detaje të cilat jo vetëm që bëjnë sekret hetimor, po skandalizojnë opinionin duke i interpretuar çdo farë personi.
Ju porosis:
Asnjë komunikim me mediat për asnjë lloj argumentimi.
Pasqyrimi i punës suaj do të bëhet nëpërmjet zëdhënësit të drejtorisë dhe Drejtorisë së Përgjithshme.
Në çdo rast që do të konstatoj, do të filloj pa hezitim ecurinë e rëndë disiplinore ndaj jush. Me të njëjtin shqetësim përcilleni të vartësit tuaj këtë mesazh.
Nuk dua justifikime për daljen e tyre, por ju porosis të jeni të vëmendshëm për ecurinë. Konfirmoni”, thuhet në mesazhin e Ministrisë së Brendshme”, raporton “Balkanweb”.
