Pas ngjarjeve kriminale në vend, me një bilanc negativ, mësohet se Ministri i Brendshëm, Sandër Lleshaj është drejtuar për në Shkodër, aty ku po mban edhe një takim me drejtorin e policisë, Ardi Veliu. Takimi mes palëve po mbahet në prefekturën e qarkut Shkodër. Dy vëllezër u ekzekutuan mëngjesin e së shtunës në qytetin e Shkodrës, teksa po dilnin nga banesa e tyre.
Vëllezërit Astrit dhe Ibrahim Bilali u qëlluan me breshëri automatiku në hyrje të banesës, në lagjen Kiras të Shkodrës.
Më datë 1 shtator të një viti më parë, djali i Astrit Bilalit, Asmer Bilali, anëtar i bandës “Bajri”, u dyshua të jetë shënjestra e një atentati ku mbeti i vrarë Arjan Ferracaku, ngjarje kjo ende pa autor.
Viktima Astrit Bilali ka në pronësi një kompleks hipizmi në zonën e Kirasit, ndërsa viktima tjetër, Ibrahim Bilali ka qenë një nga liderët e e lëvizjes së 2 Prillit në Shkodër.
Bilanci i vrasjeve dhe ende asnjë ngjarje e zbardhur apo e dokumentuar është një tregues se grupet e strukturuara kriminale e kanë fituar betejën me shtetin.
