Ministrja Frida Krifca në interpelancën e saj parlamentare, iu përgjigj deputetit Erion Braçe në lidhje me akuzat për çmimet e tregut duke theksuar parimet e një tregu të lirë që operohet në vendin tonë.
“Ministria e Bujqësisë ka në dorë instrumente të cilat janë në pajtim me parimin e një tregu të lirë, ku çmimi përcaktohet nga kërkesa dhe oferta dhe nuk është detyra e shtetit të ndërhyjë në këtë çmim.
Sigurisht çmimet që ju përmendni nuk marrin parasysh kostot e grumbullimit, seleksionimit, transportit etj. Unë do preferoja që t’i orientojmë politikat tona zhvilluese aty ku ne mund të dimë ta bëjmë punën tonë, jo duke ndërhyrë në treg”.
Ministrja riktheksoi se ky vit ka pasur buxhetin më të lartë të dhënë ndonjëherë për fermerët dhe zhvillimin rural.
“Nuk ka ndodhur kurrë që ne të kemi pasur në skemën kombëtare 30 mijë përfitues në datën 7 korrik.
Skema është përthithur 10-15%. Mund të bëjmë analizën se sa fermerë kanë aplikuar. Keni shumë të drejtë të kërkoni më shumë buxhet. Duhet më shumë buxhet, por ky vit ka buxhetin më të lartë ndonjëherë”.
