Kryetari i Unionit të Gazetarëve, Aleksandër Çipa ka vizituar Shtëpinë e Vatrës në Shtetet e Bashkuara të Amerikës. Në takimin e zhvilluar me përfaqësuesit e Vatrës, Çipa ka theksuar se ky institucion i ndërgjegjes kombëtare duhet të vijojë të shërbejë si një udhërrëfyes për Shqipërinë, e cila gjendet në ditë të vështira.
Duke iu referuar çështjes së korrigjimit të kufijve midis Kosovës dhe Serbisë, si dhe kaosit politik dhe ekonomik që mbizotëron në Shqipëri, Çipa vuri në dukje se Vatra duhet të jetë pishtari për të orientuar në mënyrën e duhur shqiptarët, ashtu siç ka bërë për 106 me radhë.
“Erdha me familjen time në Vatrën shqiptare në respekt të veprave të mëdha dhe shërbimeve kombëtare që kanë bërë Vatranët. Zëri i Vatrës dëgjohet me respekt në të gjithë hapësirat shqiptare. Është kjo arsyeja përse unë do t’ju apeloja që të na prini në unifikimin e qëndrimeve Kombëtare sepse Kombi po kalon momente të vështira, qoftë në “korrigjimin”e zgjidhjen e asaj çfarë ka ndodhur për 70 vjet me fqinjin Jugor-Greqinë, qoftë edhe me atë ç’ka flitet për ndryshim, korrigjim kufijsh apo shkëmbim territoresh mes Kosovës dhe Serbisë! Zëri i Vatrës, ashtu siç ka bërë për 106 vite, duhet të na orientojë e të na ftillojë në kushtet e një kaosi politik që mbizotëron në vend”, është shprehur kreu i UGSH-së, Aleksandër Çipa.
Gazetari Aleksandër Çipa e vizitoi Vatrën së bashku bashkëshorten dhe me dy djemtë e tij. Kryetari i Vatrës z. Dritan Mishto i uroi mirëseardhjen dhe e prezantoi me veprimtaritë dhe shqetësimet e Vatrës.
“Sot me 21 Gusht 2018, në mbrëmje, isha mysafir në Shtëpinë e Vatrës historike, në Vatrën Kombëtare të Amerikës. U ndjeva i emocionuar në këtë Institucion të përfaqësimit të ndërgjegjes Kombëtare. Është Vatra e bijve dhe Etërve të identifikimit Kombëtar në Diasporën Shqiptare në përgjithësi, dhe në USA në veçanti. Takimi me drejtues të Vatrës, me Kryetarin Dritan Mishto, dhe bashkëbisedimi më bashkëpunëtorët e tij, përbën një ngjarje në jetën time dhe një mbresë e thellë shpirtërore gjatë vizitës time në Shtet e Bashkuara të Amerikës”- Këto fjali i shkëputëm nga mbresat që shkroi z. Aleksandër Çipa, Kryetar i Unionit të Gazetarëve të Shqipërisë, në librin e vizitorëve të Vatrës”, theksoii Çipa.
Gjatë prezantimit z. Mishto tha se Vatra ndjehet mirë që pret sot një nga gazetarët më me integritet në Shqipëri, një përfaqësues nga një familje e njohur atdhetare himarjote, ku spikat ikona Lefter Çipa, ati i tij, gjyshi i Akrit, që e kemi gjithmonë pranë Vatrës.
Më pas z. Mishto përcolli shqetësimin e Vatrës për zhvillimet e fundit në Kosovë e Shqipëri, pa lënë jashtë vëmendjes trevat e tjera Kombëtare. Lëvizja për ndryshim, korrigjim kufijsh e këmbim territoresh në Kosovë, për Vatrën, e cila ka dalë edhe me një deklaratë tashmë të publikuar, nuk është në favor të shqiptarëve. Po ashtu edhe zhvillimet në Shqipëri, marrëdhëniet Shqipëri-SHBA, janë brengosëse për ne vatranët.
Vatra dënon edhe agresivitetin e nostalgjikëve të diktaturës. Përpjekja për të humbë Kujtesën e shqiptarëve nga krimet e diktaturës komuniste dhe nxitja e nostalgjisë për diktatorin, janë qëllimkëqija dhe synojnë të mbajnë demokracinë peng.
Vatra e denoncon me forcë këtë prirje dhe i bën thirrje shoqërisë civile të kundërshtojë me forcë kahet e politikës së interesuar për ta mbajtur peng Demokracinë shqiptare. Debati për Kampin e internimit në Tepelenë, duket se ka prapaskena politika qëllimkëqija, tha kryetari Mishto.
Vatra ka në gjirin e vet dhenë strukturat e saj vatranë që së bashku me familjet e tyre kanë qenë pjesë e dramës të atij kampi famëkeq. Vatra përmes gazetës së saj “Dielli” e ka lënë debatin e lirë dhe në Ditën e Kujtesës ka hartuar një deklaratë, që përkrah ngritjen muzeut të kujtesës.
Gazetari Çipa, ka falënderuar për mikpritjen e Vatrës. Ai theksoi se këtë vizitë e kishte pritë me shumë emocion.
“Erdha me familjen time në Vatrën shqiptare në respekt të veprave të mëdha dhe shërbimeve kombëtare që kanë bërë Vatranët. Zëri i Vatrës dëgjohet me respekt në të gjithë hapësirat shqiptare. Është kjo arsyeja përse unë do t’ju apeloja që të na prini në unifikimin e qëndrimeve Kombëtare sepse Kombi po kalon momente të vështira, qoftë në “korrigjimin”e zgjidhjen e asaj çfarë ka ndodhur për 70 vjet me fqinjin Jugor-Greqinë, qoftë edhe me atë ç’ka flitet për ndryshim, korrigjim kufijsh apo shkëmbim territoresh mes Kosovës dhe Serbisë! Zëri i Vatrës, ashtu siç ka bërë për 106 vite, duhet të na orientojë e të na ftillojë në kushtet e një kaosi politik që mbizotëron në vend”
Më pas ai ka bërë një pasqyrë të detajuar të gjendjes së sotme të gazetarisë në Shqipëri, e Kosovë, dhe ka zbuluar plagët e saj. Përmes statistikave ai ka treguar rritjen e mediave online (rreth 800)- të atyre audiovizive, të raportit të zhdrejtë të medias profesionale dhe asaj amatore, të represionit të pushtetit shtetëror, politik, ndaj pushtetit mediatik etj.
Ai tha se tregu mediatik shqiptar nuk funksionon normalisht dhe se Shqipëria përjeton krizën e raportimit profesional. Kryetari i Unionit të gazetarëve Shqiptarë theksoi se vetë media duhet të reformohet. Ndërsa shtroi domosdoshmërinë e bashkëpunimit të Unionit që drejton me Federatën Vatra.
