Komisioni i Ligjeve pritet të mblidhet sot në orën 09:00, për shqyrtimin e kandidaturave për zgjedhjen e Kreut të Shtetit. Sakaq, në orën 17.00, Kuvendi zhvillon raundin e parë të votimit. Afati i partive për të paraqitur propozimet ishte ditën e djeshme, por ende nuk ka asnjë emër në diskutim.
Afati i fundit i regjistrimit të pretendetëve për t´u zgjedhur udhëheqësi më i lartë i shtetit shqiptar përfundoi dje në orën 16:00. Për rrjedhojë, Konferenca e Kryetarëve që do të mblidhet sot, do të miratojë për procedurë zhvillimin e seancës së posaçme për zgjedhjen e Presidentit në Kuvend. Pavarësisht se nuk do të zhvillohet votim për shkak të mungesës së emrave të veçantë për t´u votuar për drejtues të Shqipërisë, Kushtetuta e njeh si raund formal.
Një deputet nuk mund të propozojë më shumë se 1 kandidat për President. Kushtetuta e Shqipërisë parashikon që raundi konsiderohet i bërë edhe nëse nuk paraqitet asnjë kandidat. Pra opozita nuk e bllokon procesin as me mos pjesëmarrjen e saj në seancë, që do ta bënte të pamundur plotësimin e kuorumit në 3 raundet e para, 84 vota.
