Pak ditë më parë, në një konferencë për mediat krah Ministrit të Drejtësisë, Ulsi Manja, kryeministri Rama apeloi ndaj Prokurorisë së Posaçme SPAK, që të hetojë ish-kryeministrin Sali Berisha, bashkë me presidentin Ilir Meta për abuzimet që ai tha se kanë bërë gjatë kohës që kanë qenë apo janë në krye të institucioneve publike. Në konferencën për gazetarët, ai tha se SPAK duhet të veprojë kundrejt personave të korruptuar. Në të njëjtën kohë ai shigjetoi edhe anëtarët e partisë së tij, kur deklaroi se do të bëjë kallëzime edhe për kryetar Bashkie që kanë abuzuar me fondet. Sipas tij, çdo kush që ka turpëruar Partinë Socialiste, drejtësia duhet t’i kishte kapur me kohë. “Shumë shpejt do të keni kallëzime edhe për figura të Partisë Socialiste nga njësia anti-korrupsion, do të keni kallëzime atij në SPAK për kryetar Bashkie që kanë turpëruar PS, që duhet ti kishte kapur më parë drejtësia”, u shpreh Rama.
Kreu i Njësisë Antikorrupsion, Gjergj Prebibaj, në një intervistë të dhënë për “Report Tv”, ka folur për shkeljet në Hipoteka, mungesën e faqeve pasi janë grisur dhe paralajmërimet e kryeministrit Edi Rama për kryebashkiakët, të cilët do të kalojnë në sitën e SPAK.
Për paralajmërimin e Ramës se njësia Antikorrupsion do të dorëzojë shumë shpejt kallëzime penale në SPAK për kryetarë Bashkie, Gjergj Prebibaj u shpreh se nuk mund të flasë me emra për shkak të sekretit hetimor. Ndër të tjera shtoi se 21 raste të zyrtarëve që kanë kryer shkelje, janë çuar në SPAK.
“Rrjeti i Koordinatorëve kundër Korrupsionit, bashkëpunon me njësitë e pushtetit vendor, mbledh informacion, heton dhe verifikon raste. Ne kemi kërkuar informacione jo vetëm me veprimtarinë e Bashkive, por edhe institucioneve të tjera nga të gjitha Bashkitë e vendit. Sa i përket deklaratave të kryeministrit, nuk mund të shprehem.
Bashkëpunimi jonë me SPAK dhe Prokurorinë e Përgjithshme është përcaktuar dhe në vendimin e Këshillit të Ministrave. Kemi referuar në total 21 persona me kallëzime penale dhe në dijeninë tonë, të gjitha këto raste janë regjistruar. Për vijimin e mëtejshme të hetimeve, nuk mund të shprehem”, tha ai.
