Kreu i këshillit të Lartë të Prokurorisë, Gent Ibrahimi, ka sqaruar grupet parlamentare të PD-së dhe LSI-së, lidhur me kërkesën e tyre për shkarkimin e kryeprokurores së përkohshme, Arta Marku dhe nisjen e hetimit disiplinor ndaj saj.
Në përgjigjen e tij, Ibrahimi sqaron se kompetencën për të nisur hetim disiplinor ndaj prokurorit të përgjithshëm e ka Inspektori i Lartë i Drejtësisë, por për sa kohë ky institucion ende nuk është krijuar, si pjesë e reformës në drejtësi, kreu i KLP-së, thotë se ligji nuk parashikon se cili institucion do ta ushtrojë kompetencën, deri në krijimin e Inspektorit të Lartë të Drejtësisë.
Kështu, kompetenca për kërkesën e PD-së dhe LSI-së ndaj Markut, do t’i kalojë Kolegjit të Apelimit në këto kushte, derisa të mbarojë mandati i këtij institucioni. Kolegji i Apelimit, ka funksion të përkohshëm deri sa të mbarojë procesi i vettingut të prokurorëve dhe gjyqtarëve.
PD dhe LSI kërkuan shkarkimin e Markut, duke e cilësuar atë përgjegjëse për faktin që nuk ka verifikuar integritetin e një anëtari të Këshillit të Lartë të Prokurorisë, konkretisht për Bujar Sheshin, i cili rezultoi të ishte ish anëtar i sigurimit të Shtetit.
