Kryeministri Edi Rama, i pranishëm në takimin për 100-vjetorin e marrëdhënieve diplomatike mes SHBA-së dhe Shqiperisë, deklaroi se në vendin tonë nuk ka një forcë antiamerikane. Në kuadër të vendosjes së 100-vjetorit të marrëdhënieve diplomatike me SHBA-në, Ambasada Amerikane në bashkëpunim me qeverinë shqiptare dhe Ministrinë e Jashtme organizuan një aktivitet, për të vlerësuar marrëdhëniet e bashkëpunimit ndërmjet dy vendeve.
“Në vendin tonë nuk ka një forcë të mundshme anti amerikane apo dhe anti evropiane, dhe kur ka mllef dhe ndjenjë hakmarrje jo ndaj SHBA-së, por ndaj politikës së SHBA-së si është mllefi ndaj Reformës në Drejtësi, shfaqet në një formë gare dashurie kush e do më shumë Amerikën.
Madje deri në pikën që ne e duam Amerikën më shumë se ambasadorët amerikanë. Ky është aspekti komik dhe shumë domethënës që s’ka sot këtu një burrë që t’ja thotë SHBA-së në sy atë që realisht mendon kur i dridhen gjunjët nga Reforma në Drejtësi apo kur i vjen tmerr të dalë nga shtëpia se i shikojnë damkën në lule të ballit.
Gjithmonë të gjithë jemi për SHBA-në, disa janë për marrëdhëniet me këto SHBA disa të tjerë duan ato SHBA se janë pasardhës të Linkoln apo Rusveltit dhe kanë probleme me përfaqësuesit e tyre sot që e kanë ulur shumë nivelin”.
Sipas Ramës, SHBA në Shqipëri “janë në shtëpinë e tyre se kështu e kanë vendosur shqiptarët e kështu e ka dashur gjithë kjo rrugë”
“E shkuara vazhdon të jetë pjesë e përpjekjes sonë të përditshme, vazhdon rishfaqet në forma nga më të ndryshmet nga rezistenca ndaj ndryshimit dhe rezistenca ndaj krijimit të kushteve që në këtë vend të ketë drejtësi të drejtë për të gjithë deri tek hijet e të shkuarës më të errët komuniste, që ne mendojnë se i ka tretur e kaluara por prapë pa pritur e pa kujtuar na dalin para”, tha Rama.
