Partia Demokratike përveçse humbi zgjedhjet parlamentare të 25 qershorit, tashmë do të duhet të kthejë një pjesë të fondit që tërhoqi nga ky buxhet para fushatës elektorale. Shumë që Partia Demokratike do të duhet të kthejë në buxhetin e shtetit është 1.7 milionë lekë të rinj.
Por, nuk është vetëm Partia Demokratike ajo që do të duhet të kthejë mbrapsht një pjesë të financimeve të fushatës elektorale, por janë edhe republikanët. Këta të fundit duhet të kthejnë rreth 2 milionë lekë të rinj.
Ndërkaq, ditën e nesërme Komisioni Qendror i Zgjedhjeve do të marrë nesër vendimin mbi detyrimin që ka Partia Demokratike dhe ajo Republikane, ndërsa pritet të miratojë fondin shtesë për PS, LSI, PDIU dhe PSD-në e Skënder Gjinushit.
Listës së partive që penalizohen nga përllogaritja e sasisë së fondit publik që do t’u shpërndahet partive politike që morën pjesë në zgjedhjet e 25 qershorit, janë edhe 11 parti të vogla politike, ku përfshihet edhe Fryma e Re Demokratike e Bamir Topit.
Këto parti shënuan rezultate tejet të dobëta në zgjedhje dhe nuk arritën të kalonin as pragun e 3 përqindëshit që t’ i bënte ato parti parlamentare.
FRD duhet të kthejë në buxhet 1.1 milionë lekë, ndërsa Partia Demokracia Sociale e Paskal Milos, rreth 470 mijë lekë.
Sfida, Aleanca Demokratike, Partia Aleanca Demokristiane, Partia Komuniste e Shqipërise, Partia Aleanca Popullore për Drejtësi, Partia Bashkimi Demokristian Shqiptar do të duhet të kthejnë buxhetit 325 mijë lekë, aq sa iu akordua nga Komisioni Qendror i Zgjedhjeve paradhënie për fushatën elektorale.
Komisioni Qendror i Zgjedhjeve do t’u shtojë fondet partive që u rritën në zgjedhjet e 25 qershorit, ku do të përfitojnë 6 prej tyre. Partia Socialiste do të marrë 2.8 milionë lekë, Lëvizja Socialiste për Integrim do të marrë 1.3 milionë lekë, Partia e Shpëtim Idrizit PDIU-ja 1.4 milionë lekë shtesë, PSD-ja e Skënder Gjinushit 223 mijë lekë, ndërsa Libra e Ben Blushit 501 mijë lekë shtesë nga buxheti i shtetit.
Në total për partitë me rezultat pozitiv krahasuar me vitin 2013, do të ndajnë midis tyre fondin prej 6.3 milionë lekësh. Nga përllogaritja e relacionit të Komisionit Qendror të Zgjedhjeve del se një votë e krahasuar me numrin e zgjedhësve që votuan më 25 qershor vlen 42 lekë.
“Komisioni Qendror i Zgjedhjeve, ditën e hënë, më datë 31.07.2017, ora 10:00, zhvillon mbledhjen me këtë rend dite: Shqyrtimi i projekt vendimeve, për caktimin e sasisë së fondit publik që do tu shpërndahet partive politike pjesëmarrëse në Zgjedhjet për Kuvendin të datës 25 Qershor 2017, për shpalljen e rezultatit të shortit për emërimin e ekspertëve kontabël të licencuar, të cilët do të kryejnë auditimin e fondeve të përfituara dhe të shpenzuara nga subjektet zgjedhor për fushatën zgjedhore, për Zgjedhjet për Kuvend 2017”, thuhet në njoftimin e Komisionit Qendror të Zgjedhjeve.
