Komisioni Qendror i Zgjedhjeve, ka publikuar moshën mesatare të kandidatëve për deputetë që kanë rezultuar fitues në bazë të rezultateve paraprake.
Deputetja më e re e Kuvendit të Shqipërisë e cili do të nisë punimet në shtator të këtij viti është Andia Ulliri, 22 vjeçe. Ajo ishte e renditur e gjashta në listën e PD në qarkun e Durrësit, ku arriti të marrë 5595 vota.
Ndërkohë, deputetja më e moshuar në Kuvend do të jetë inxhinerja e njohur Luljeta Bozo, 79 vjeçe.
Moshën mesatare më të re e ka LSI me 45.5, ndërsa atë më të vjetër, PSD me 49.7. Pak më pak pas saj vjen PD me 49.5 dhe PS me 49.3.
Nën 35 vjeç janë 10 deputetë, 36-45 vjeç janë 33 deputetë, 46-50 vjeç janë 32 deputetë, 51-60 vjeç janë 53 deputetë, 61-70 vjeç janë 9 deputetë dhe mbi 70 vjeç janë 3 deputetë.
Zgjedhjet parlamentare të 25 prillit u fituan nga Partia Socialiste, e cila siguroi 74 mandate dhe do të qeverisë sërish e vetme në 4 vitet e ardhshme.
Ndërkohë, Partia Demokratike mori 59 mandate, Lëvizja Socialiste për Integrim 4 mandate dhe Partia Social Demokrate, 3 mandate.
