KQZ në njoftimin e saj për mediet ka bërë të ditur se deri në ora 13.00 përqindja e votuesve në zgjedhjet parlamentare në Shqipëri është 25.69 %.
Zëdhënësja e KQZ-së, Drilona Hoxhaj ka bërë të ditur se nga 12 qarqe, vetëm ai i Kukësit nuk ka dërguar të dhënat për pjesëmarrjen e qytetarëve deri në ora 13.00, prandaj i ka bërë thirrje komisionerëve të këtij qarku që sa më shpejt ta bëjnë një gjë të tillë.
“Nga 5362 qendra të votimit kanë raportuar vetëm 26 për qind e të gjithë qendrave të votimit, thënë ndryshe 1414 qendra votimit kanë përcjellë të dhënat. Sipas tyre rezulton se në Qarkun e Beratit pjesëmarrja është 27.42 %, Dibër 29.5 %, Durrës 23.0 %, Elbasan 23.12 % , Fier 21.79 %, Gjirokastër 27.23 %, Korçë 28.49 %, Lezhë 31.92 %, Shkodrës 31.07 %, Tiranë 29.76 %, ndërsa në Qarkun e Vlorës pjesëmarrja ka qenë 22.17 për qind. Domethënë nga 12 qarqe, Qarku i Kukësit nuk ka bërë raportime”, ka thënë Hoxhaj.
Ajo u ka bërë thirrje të gjithë komisionarëve të qendrave të votimit patjetër që të hedhin dhe të komunikojnë me qendrën e të dhënave të komisionit zgjedhor dhe të përcjellin të dhënat në sistem, pasi këtë nuk po e bëjnë në mënyrë të rregullt.
Hoxhaj u ka bërë me dije qytetarëve që të komunikojnë me KQZ-në, për të raportuar për parregullsitë eventuale gjatë procesit zgjedhor. Ajo po ashtu ka bërë thirrje për raportime të drejta nga procesi zgjedhor, në mënyrë që të mos shkaktohet kaos tek publiku.
