Komisioni i Pavarur i Kualifikimit ka konfirmuar në detyrë gjyqtaren e Krimeve të Rënda, Iliriana Olldashin.
Procesi i rivlerësimit u krye nga trupa gjykuese e përbërë nga Pamela Qirko kryesuese, Xhensila Pine relatore dhe Etleda Çiftja anëtare. I pranishëm në seancë si vëzhgues ndërkombëtar ishte Ferdinando Buatier.
“Disponoj pasuri modeste, por të rëndësishme për mua dhe familjen. E vlerësoj korrekt dhe kërkoj konfirmimin në detyrë”, tha gjyqtarja gjatë fjalës së saj.
Iliriana Olldashi e ka filluar karrierën në sistemin e drejtësisë në vitin 2000 si gjyqtare në Gjykatën e Fierit. Në vitin 2005, ajo është emëruar gjyqtare në Gjykatën e Krimeve të Rënda në Tiranë, detyrë të cilën e kryen edhe aktualisht.
