Pas analizimit në 3 kritere nga Komisioni i Pavarur i Kualifikimit, drejtuesi i Prokurorisë së Krujës, Petrit Çano, është konfirmuar në detyrë.
Trupa gjykuese ishte e përbërë nga Suela Zhegu, Olsi Komici dhe Lulzim Hamitaj ndërsa Çano është vlerësuar pozitivisht sa i përket, pastërtisë së figurës, profesionalizmit edhe pasurisë.
Ndaj tij ishte vetëm një denoncim i një qytetari nga Kruja me mbiemrin Bami, që thoshte se makina e tij e parkuar është goditur nga një tjetër automjet, që shofere ishte vajza e prokurorit.
Çështja në fjalë është pushuar për mungesë të autorit dhe denoncuesi pretendon se e ka referuar në polici, por çështja nuk është regjistruar aty. Çano tha se kishin lënë takim poshtë pallatit për t’u sqaruar dhe se denoncuesi kishte pretenduar se makinën ia kishte dëmtuar një vajzë bionde me Fuoristradë.
“Këto të dhëna nuk lidhen me vajzën time dhe në atë periudhë vajza nuk ka pasur makinë dhe nuk jetonte në të njëjtin pallat. Nuk jemi përgjegjës dhe nuk kam shkelur etikën. E kam takuar për sqarim dhe komunikimi im ka qenë korrekt,” është shprehur Çano gjatë seancës dëgjimore në KPK.
