Federica Mogherini do të takojë këtë javë presidentët e Kosovës dhe të Serbisë, Hashim Thaçi dhe Aleksandar Vuçiç. Shefja e politikës së jashtme të Bashkimit Evropian pritet të zhvillojë këtë takim të rëndësishëm më 31 gusht.
“Këtë javë do të takoj sërish presidentin Vuçiç dhe presidentin Thaçi për të çuar përpara dialogun midis Beogradit dhe Prishtinës”, tha ajo duke iu adresuar ambasadorëve të BE-së në Bruksel.
Mogherini theksoi se edhe pse këtë vit në Ballkan ka pasur rritje tensionesh në momente të ndryshme dhe në vende të ndryshme, në fund të ditës, partnerët tanë në Ballkan kanë arritur të rikonfirmojnë përkushtimin dhe kapacitetin e tyre për të avancuar në rrugën drejt BE-së”.
“Ne i kemi ndihmuar, por ata e kanë bërë”, përfundoi Mogherini.
