Në Kosovë u konfirmuan të hënën pesë raste të reja me koronavirus. Instituti Kombëtar i Shëndetësisë Publike të Kosovës tha se rastet pozitive rezultuan pas testimit të 2,007 mostrave.
Sipas njoftimit, në 24-orëshin paraprak, 184 pacientë janë shëruar nga koronavirusi, ndërsa nuk është raportuar për asnjë viktimë. Aktualisht, raste aktive me koronavirus në Kosovë janë 2,201.
Deri më tani, janë duke u vaksinuar personat e moshës 65-79 vjeç, pasi fillimisht janë vaksinuar mbi 80-vjeçarët, punonjësit shëndetësorë dhe personat me sëmundje kronike.
Njoftimi i IKSHPK
Gjatë 24 orëve të fundit, në Laboratorin e Mikrobiologjisë Molekulare në IKShPK dhe laboratoret private me metodën RT-PCR, si dhe laboratoret publike dhe private me metodën RAT, janë testuar gjithsej 2.007 mostra të marra nga ShSKUK dhe gjurmimi i kontakteve të rasteve në terren, prej të cilëve rezultojnë 5 raste pozitive.
Brenda 24 orëve nuk është raportuar asnjë rast i vdekjes me SARS CoV-2 pozitiv.
Numri total i rasteve pozitive është 107.410 raste nga 611.357 persona të dyshimtë në virusin SARS-CoV-2 dhe 2.243 raste të vdekjes.
Gjatë 24 orëve të fundit, janë shëruar 184 pacientë derisa numri i përgjithshëm i të shëruarve deri më sot është gjithsej 102.966 raste, kurse numri i rasteve aktive është 2.201.
Rastet pozitive janë nga komunat: Fushë-Kosovë, Gjilan, Mitrovicë, Obiliq dhe Prishtinë, secila me nga një rast.
Mbuloni gojën dhe hundën me maskë!
Mbani higjienën!
Respektoni distancën!
