Qeveria e Kosovës ka vendosur sot që të ndalojë lojërat e fatit për një periudhë 10-vjeçare.
Vendimi erdhi pak ditë pas ngjarjeve të rënda, ku në Kosovë u vranë dy persona brenda lojërave të fatit, gjë që çoi në miratimin e rezolutës në Kuvend duke i kërkuar qeverisë mbylljen e këtyre aktiviteteve.
Kryeministri i Kosovës, Ramush Haradinaj tha se me këtë projektligj ndalohen të gjitha lojërat e fatit, përveç Lotarisë së Kosovës.
“Qëllimi i hartimit është zbatimi i rezolutës së Kuvendit të Kosovës me të cilën kërkohet nga qeveria ti nis procedurat ligjore për ndalimin deri në miratimin e ligjit për lojërat e fatit. Me këtë projektligj ndalohen te gjitha lojërat e fatit përveç Lotarisë së Kosovës”, tha Haradinaj.
Ligji për mbylljen e lojërave të fatit po zbatohet në Shqipëri që prej 1 janarit, ndërsa një pjesë e tyre u zhvendosën në Kosovë.
