Ministrja e Punëve të Jashtme, Meliza Haradinaj-Stublla, ka dalë kundër masave të propozuara nga qeveria në lidhje me COVID-19. Me anë të një postimi në Facebook, ajo shprehet se është mjaft absurde kërkimi i një testi negativ për kosovarët që kthehen nga Shqipëria.
Qeveria ka propozuar që qytetarët që qëndrojnë më gjatë se 48 orë në Shqipëri, gjatë kthimit duhet të tregojnë testin negativ për COVID-19, në të kundërtën duhet të vetizolohen për shtatë ditë.
Ajo citon më tej se është absurde të vetizolohen rreth 100.000 qytetarë, pa asnjë bazë. Sipas saj, ajo cfarë duhet mbeten higjiena, ruajtja e distancës dhe mbajtja e maskës.
Statusi
“Propozimet për shtim të masave duke kërkuar testin negativ për hyrje nga kufiri me Shqipërinë, janë absurde, thënë më së paku.
Është një numër i madh i qytetarëve tanë që veçse janë në Shqipëri, dhe në mungesë të testeve, është krejt absurde të vetëizolohen rreth 100,000 qytetarë, pa asnjë bazë.
Logjika e izolimit total kufitar, ka sjellur vetëm dëme, sidomos për ata që kanë nevojë për trajtim shëndetësor jashtë Kosovës! Unë do të votoj KUNDËR këtij propozimi.
Masat e rekomanduara nga IKSHP, duhet të respektohen maksimalisht nga qytetarët, por jo të izolohemi e të thellohet edhe më tej kriza.
Higjienë, distancë dhe maskë! Kaq e thjeshtë.
