Komisioni Qendror i Zgjedhjeve ka bërë të ditur se ka përfunduar numërimi i fletëvotimeve që mbrëmjen e djeshme, por se kanë mbetur pa u procesuar të dhënat për 4% të vendvotimeve.
Në bazë të dhënave të publikuara në faqen e KQZ-së, Lëvizja Vetëvendosje kryeson me 197,966 vota ose 25,79%.
E dyta është LDK me 192.300 vota ose përkthyer në përqindje 25,05%.
Ndërkohë, e treta renditet Partia Demokratike e Kosovës e cila ka marrë 162.342 vota apo 21.15%.
Këto janë vetëm rezultate preliminare të cilat nuk përfshijnë votat me kusht, votat me postë dhe votat e personave me nevoja të veçanta.
Deri më tani raportohet se janë numëruar 95,88% të votave, apo 2442 vendvotime nga 2547 që janë gjithsej.
Mbrëmjen e djeshme, kreu i Vetëvendosjes, Albin Kurti, shpalli fitoren teksa shtoi se do të nisë bisedimet me Lidhjen Demokratike për formimin e Qeverisë.
“Do ta kemi qeverinë sa më parë”, tha Kurti.
Nga ana tjetër, kandidatja e LDK-së për kryeministre, Vjosa Selmani, deklaroi mbrëmë në një konferencë për mediat se nuk mund të flitet akoma për një fitues, pasi duhet të pritet numërimi i të gjithë votave.
“Në radhë të parë dua të falënderoj të gjithë qytetarët për pjekurinë e treguar në këtë proces zgjedhor e në veçanti për pjesëmarrjen masive që rezultoi me largimin e partive që deri tani kanë keqqeverisur e me fitoren e madhe të opozitës. Dua të falënderoj në veçanti përkrahësit e LDK-së për mbështetjen e madhe e që na dhanë mundësinë që për vetëm një muaj ta ngrisim partinë tonë e ta rikthejmë fuqishëm. Për sonte pajtohemi që s’mund të shpallet fituesi meqenëse do të presim deri në numërimin e votës së fundit. Rezultati do të përcaktohet nga mërgata dhe votat me kusht siç duket”, ka deklaruar ajo.
Pas përfundimit të procesit zgjedhor, erdhi edhe reagimi i kryeministrit në detyrë, Ramush Haradinaj, në të cilat koalicioni i përbërë nga partia e tij, AAK dhe PSD, deri më tani radhitet e katërta, me rreth 11 për qind të votave.
Haradinaj përgëzoi qytetarët për nivelin e lartë të pjekurisë politike dhe demokratike, ndërsa ka falënderuar institucionet për organizimin e zgjedhjeve dhe mbarëvajtjen e tyre.
Rezultatin e zgjedhjeve në Kosovë e përshëndeti edhe kryeministri Edi Rama, duke uruar Albin Kurtin dhe Vjosa Osmanin. Përmes një statusi në Twitter përgëzoi edhe Kadri Veselin i cili pranoi humbjen, duke e quajtur veprim shembullor.
“Urime Kosovës për zgjedhjet e suksesshme parlamentare! Urime Vetëvendosjes e Albin Kurtit për rezultatin më të mirë. Urime LDK e Vjosa Osmanit për rezultatin e dytë më të mirë. Urime PDK e Kadri Veselit për pranimin shembullor të rezultatit. Sa më e mbarë dita e re për Kosovën”, shkruan Rama në Twitter.
