Në Kosovë, shumë qytetarë e kanë tepruar me bakllavanë për Kurban Bajram, e për pasojë kanë përfunduar në urgjencë. Këtë e ka konfirmuar mjekja Dafina Basholli, e cila është punonjëse në Qendrën Klinike Universitare të Kosovës. Ajo aty priti shumë pacientë që shkuan për të kërkuar ndihmë, pasi e kishin tepruar me ushqime të ëmbla. Basholli tërhoqi vërejtjen që të shmanget ngrënia e ushqimeve me shumë kalori, sepse mund të jetë e rrezikshme, sidomos për ata që vuajnë nga diabeti.
“Çdo ditë në qendrën emergjente kemi mjaft raste të atyre post-COVID, e sidomos sot që është festa e Kurban Bajramit kur njerëzit hanë ushqime me më shumë kalori, sidomos me bakllava dhe pacientët të cilët kanë diabet duhet të jenë shumë të kujdesshëm. Sot kemi pasë shumë raste që është dashur t’i trajtojmë për shkak të hiperglikemisë dhe hipertensionit, si raste emergjente”.
Ende nuk ka një numër të pacientëve që kanë shkuar për tu mjekuar, pasi siç thotë ajo, numri i tyre po shtohet me kalimin e orëve. “Numri i tyre mjaft i madh. E shihni që po hynë e dalin për këtë shkak”.
