Nga data 30 korrik, në Kosovë do të nis të zbatohen masat e reja anti-Covid. Duke parë numrin në rritje të të infektuarve, qeveria e ka parë të udhës që së shpejti të nis të aplikohen masat e reja, për të frenuar koronavirusin vdekjeprurës.
Për 24 orë sipas IKSHPK-së, nga 404 mostra të marra nga ShSKUK dhe gjurmimi i kontakteve të rasteve në terren, rezultuan gjithsej 276 raste pozitive.
Prej datës 30/07/2020, të gjithë shtetasit e Republikës së Kosovës që vijnë me risk të lartë të infeksionit (Republika e Shqipërisë, Malit të Zi, Maqedonisë së Veriut dhe Serbisë) janë të detyruar të vetëizolohen për 7 ditë në shtëpitë e tyre, bëjnë me dije burime të Indeksonline.
Gjithashtu nga kjo datë të gjithë shtetasit kosovarë (qytetarët me leje qëndrim dhe ata me leje të përkohshëm) që dalin jashtë territorit të Republikës së Kosovës dhe nuk kthehen brenda 48 orëve, janë të detyruar që të dëshmojnë se nuk janë të infektuar. Në të kundërt do të vetëizolohen për 7 ditë.
Po ashtu të gjithë personat që do të vetëizolohen, evidentohen në regjistër nga Policia e Kosovës në të gjitha pikat kufitare në territorin e Republikës së Kosovës.
Të gjithë qytetarët e Republikës së Shqipërisë, Maqedonisë së Veriut, të Malit të Zi, Bosnjes e Serbisë që hyjnë në Kosovë, duhet të dëshmojnë përmes testit që nuk janë të infektuar.
