Instituti Kombëtar i Shëndetësisë Publike në Kosovë, (IKSHPK), ka regjistruar 297 raste të reja me koronavirus, pas testimit të 2,667 mostrave në institucionet publike dhe ato private.
Në 24 orët e fundit, 5 pacientë nuk kanë mundur ta fitojnë betejën me koronavirusin.
“Rastet e vdekjes janë nga komunat: Prishtinë 2 raste (81, 53 vjeç), Ferizaj 1 rast (79 vjeç), Rahovec 1 rast (80 vjeç) dhe Suharekë 1 rast (57 vjeç)”, informon IKSHPK.
Në të njëjtën periudhë, këtë sëmundje e kanë mposhtur 311 persona, derisa raste aktive me koronavirus janë 6,857.
Prej 13 marsit të vitit të kaluar, autoritetet shëndetësore në Kosovë kanë regjistruar 65,065 persona të infektuar me koronavirus. Prej tyre 1,553 pacientë kanë vdekur.
