Kosova ka pranuar sot pjesën e dytë të ndihmës nga Bashkimi Evropian, për luftën kundër pandemisë.
Kosova ka përfituar nga BE një ndihmë prej 5 milionë eurosh. Pjesa e parë e kësaj ndihme ishte dorëzuar më 30 prill.
Sipas Rel, pakoja e dorëzuar ditën e sotme përmban 60 mijë maska për frymëmarrje, 19 mijë mburoja për fytyrën, 60 mijë shtroje njëpërdorimshe, 171 mijë palë doreza kirurgjikale, dhe 15 mijë litra dezinfektues duarsh.
Ishte zv.shefi i Zyrës së BE-së në Kosovë, Riccardo Serri ai që bëri dorëzimin e kësaj pakoje.
Këshilli i Bashkimit Evropian ka miratuar sot vendimin, për të siguruar deri në 3 miliardë euro ndihmë makro-financiare për 10 vendet partnere, në kuadër të procesit të zgjerimit dhe disa vendeve tjera, për t’i ndihmuar ato të përballen me pasojat ekonomike të pandemisë së COVID-19. Në kuadër të kësaj ndihme për Kosovën janë paraparë të ndahen 100 milionë euro.
Nga vendet e rajonit që do të përfitojnë janë: Shqipëria (180 milionë), Bosnje dhe Hercegovina (250 milionë), Mali i Zi (60 milionë), Maqedonia e Veriut (160 milionë). Vendet tjera përfituese janë, Gjeorgjia, Jordania, Tunizia, Moldavia dhe Ukraina. Ndihma financiare do të ofrohet në formën e kredive me mbështetjen e Fondit Monetar Ndërkombëtar.
