Kosova, sikundër Shqipëria, i ka hapur dyert ardhjes së afganëve. Presidentja Vjosa Osmani ka pohuar se Kosova ka pranuar ardhjen e tyre pa asnjë hezitim, për të shpëtuar jetët që ndodhen në rrezik. Osmani tha se Kosova e respekton të drejtën ndërkombëtare, prandaj nuk u mbyllet dera refugjatëve.
Sipas saj, duhet qëndruar pranë aleatëve, ashtu siç edhe ata kanë qëndruar pranë Kosovës. “Pa asnjë hezitim apo kushtëzim të vetëm, kam dhënë pëlqimin tim për strehimin e përkohshëm të afganëve, duke u nisur së pari nga parimi njerëzor se nuk u mbyllen dyert atyre që pa fajin e dëshirën e tyre janë të detyruar të lënë vatrat e tyre për t’i ikur përndjekjeve dhe për të shpëtuar jetë; së dyti, për shkak se si anëtare e denjë e komunitetit të shteteve të lira, Kosova e respekton të drejtën ndërkombëtare dhe obligimin që rrjedh nga ajo për mos t’i mbyllur derën refugjatëve; dhe e treta, për shkak se ne duhet t’u qëndrojmë miqve tanë, e sidomos SHBA në krah, ashtu siç na qëndruan ata neve”, u shpreh ajo.
Osmani tha se qeveria ka formuar grupin punues, që do të merret me çështjet organizative. Ajo u shpreh se askush më mirë se kosovarët nuk mund ta kuptojë dëbimin dhe largimin me dhunë nga vendi. Sipas saj, tani Kosova do të dëshmojë se nuk e ka humbur ndjenjën njerëzore.
“Qeveria e Kosovës, ka formuar grupin punues që merret me çështjet organizative bashkë me partnerët tanë amerikanë. Ka qenë kërkesë e SHBA, që kjo çështje të mbetet konfidenciale për arsye të sigurisë, dhe të procesit të largimit të qytetarëve afganë nga Afganistani. Si të tillë, ne e kemi respektuar këtë kërkesë, por punën nuk e kemi ndalur. Askush më mirë se ne nuk e di çka do të thotë të dëbohesh e të largohesh me dhunë nga vendi ku je rritur. Atëherë, shumë vende anembanë botës, hapën dyert për ne pa asnjë kërkesë e asnjë kusht. Na shpëtuan. 22 vite pas atij tmerri, tani Kosova do të dëshmojë se ne kurrë nuk e humbim njerëzoren brenda”, deklaron presidentja. /Tirana Today
