Kombëtarja e Kosovës pavarësisht se është një skuadër e re, po kalon një formë fantastike, pasi një 12 ndeshjet e fundit nuk e njeh fjalën humbje. Por këtë sukses të Kosovës, serbët nuk e kapërcejnë dot, duke mos pranuar të pajtohen me realitetin. Ata shpresojnë që Serbia të mos përballet asnjëherë me Kosovën në një ndeshje.
Legjenda e Crvena Zvezdës dhe e Serbisë, Dusan Savic ka komentuar rreth një përballje të mundshme mes Kosovës dhe Serbisë në të ardhmen dhe shprehet se kjo gjë nuk duhet të lejohet të ndodhë, pasi ai e konsideron atë ende si pjesë të Serbisë.
“Ju e njihni opinionin tim kur është fjalë për një vend që nuk e njoh dhe që është një territor i krijuar në territorin që i përket Serbisë. Është idioteske që ua kemi lejuar atyre të zhvillojnë ndeshje të niveleve të larta në disa sporte tjera, pa e marrë faktin nëse luajnë me apo pa flamur, kjo është e papranueshme”, ka thënë Savic për Telegrafin serb në versionin e tij online.
“Nuk mendoj se kjo përballje mund të ndodhë në futboll. Nëse kjo do të ndodhte, me të vërtetë do të thoshte se ne kemi rënë në shkallën më të ulët. Nuk mendoj se kjo mund të ndodh”, vazhdoi Savic.
Mediat serbe po ashtu kanë shkruar rreth mundësisë që ndeshja ndërmjet Malit të Zi dhe Kosovës, të cilën ato e konsiderojnë si historike, mund të zhvillohet pa praninë e shikuesve në Podgoricë më 7 qershor.
