Nga: Enver Robelli
U vodhën së fundi mbi dy milionë euro nga arka e shtetit dhe çfarë thonë pushtetarët? Ta thërrasim Guardia di Finanza, policinë financiare italiane. E përse ka Kosova polici dhe hetuesi?
Vdiq në rrethana ende të paqarta drejtori i Agjencisë së Privatizimeve D. Asanaj (disa thonë “u vetëvra”, të tjerët “e vranë”) dhe për të ndriçuar këtë rast u kërkua ndihmë nga FBI. E përse ka Kosova polici dhe hetuesi?
Vdiq ndërsa ishte në duar të shtetit (në burg) aktivisti i VV-së A. Dehari. Versionit zyrtar se ai vrau veten pakkush i beson. Rasti ka mbetur i pandriçuar. Në hetime është kyçur një institut zviceran. Edhe në këtë rast sistemi policor, hetimor dhe gjyqësor i Kosovës është treguar i paaftë.
Brenda pak muajsh në afërsi të Prishtinës dhe në periferi të Pejës u vranë dy persona. Për këtë të Prishtinës familja tha se ishte kontaktuar nga Gjykata Speciale si dëshmitar i mundshëm. Rasti i Pejës po mbetet tërësisht enigmatik, madje viktima është varrosur pa arritur t’i bëhet analiza e ADN-së. Viktima ka qenë pjesëtar i hershëm i UÇK-së dhe potencialisht njeri me informata. Ku janë institucionet e Kosovës që nuk arrijnë të ndriçojnë këto raste?
Kurrë nuk u sqarua se si ndodhi të vidhet Dhoma e Dëshmive e Policisë së Kosovës.
Kurrë nuk u sqaruan dhjetëra vrasje, mes tyre kryearkitekti i Prishtinës, kryetarë komunash, publicistë, aktivistë politikë. Nesër, 23 nëntor, është përvjetori i vrasjes së Xhemail Mustafës. Do të kujtohet në mënyrë rutinore (fatkeqësisht) dhe policia, hetuesia e gjyqësia do të heshtin, siç kanë heshtur nga 23 nëntori i vitit 2000.
Pastaj ka njerëz që habiten që bashkësia ndërkombëtare nuk po e përqafon më Kosovën si dikur. Një shoqëri që 20 vjet flet për vrasje politike dhe nuk e sqaron gati asnjë, nuk duhet të befasohet që trajtohet me përçmim nga protektorët e saj.
Pse rrogat rriten në letra, por varfëria rritet në realitet?
