Shqipëri vijon të humbasë renditjen në perceptimin e korrupsionit në vend. Krahasimisht vendi ka humbur 8 vende me vitin e kaluar dhe kjo tendencë shikohet gjithnjë e në rritje.
Transparancy International ka publikuar sot raportin vjetor për perceptimin e korrupsionit për vitin 2017. Sipas tij, Shqipëria ka shënuar përkeqësim ne lidhje me perceptimin e korrupsionit në vend. Vitin e kaluar Shqipëri sipas këtij raporti renditej në vendin e 83-të, ndërsa këtë vit renditet në vendin e 91-të me 38 pikë.
Raporti thekson se kjo dukuri ka një tendencë në rritje në vendet me 2/3 ku janë bërë matjet. Transparency International tha se vendet me mbrojtjen më të vogël për shtypin dhe organizatat joqeveritare, kanë prirje të kenë normat më të këqija të korrupsionit.
“Ndërsa frenimi i valës së korrupsionit kërkon kohë, në gjashtë vjetët e fundit shumë vende kanë bërë pak ose aspak përparim”- vlerësoi Transparency International.
Indeksi, i cili radhit 180 vende dhe territore në bazë të nivelit të perceptuar të korrupsionit në sektorin publik, përdor një shkallë prej zero pikësh deri në 100, ku zero tregon për një vend shumë të korruptuar, ndërsa 100 një vend shumë të pastër. Kosova sivjet radhitet e 85-ta, me 39 pikë, që do të thotë se ka bërë përparim të lehtë në luftën kundër korrupsionit, kur ka qenë në vendin e 95-të me 36 pikë.
Në të njëjtin vend si Shqipëria renditet edhe Bosnje e Hercegovina, e cila vitin e kaluar ka qenë e 83-ta. Rënien më të madhe nga vendet e rajonit e ka pësuar Maqedonia – nga vendi i 90-të në vendin e 107-të, ndërsa Serbia ka rënë nga renditja 72 në vendin e 77-të.
Mali i Zi, ndërkaq, ka mbetur në vendin e 64-të, njësoj si edhe një vit më parë. Në aspektin global, Zelanda e Re, Danimarka dhe Finlanda janë vendet më të pastra sa i përket korrupsionit, ndërsa në fund të listës radhiten Somalia, Sudani Jugor dhe Siria.
