Edhe pse prej disa javësh kurba e koronavirusit në vend ka pësuar një ulje të ndjeshme, ende nuk janë hequr tërësisht masat kufizuese, duke përfshirë edhe orën policore.
E ftuar në emisionin ”Kjo Javë”, MInistrja e Shëndetësisë dhe Mbrojtjes Sociale, Ogerta Manastirliu deklaroi se Shqipëria nuk ka pasur mbyllje totale, dhe se vendosja e masave kufizuese ka sjellë ulje të shifrave.
E pyetur nëse do të hiqet ora policore, Manastirliu u shpreh se edhe lirimi i menjëhershëm i masave kufizuese, do të bëhet nëse e vlerëson Komiteti Teknik i Ekspertëve.
Sipas Manastirliut, duhet të jemi të kujdesshëm sepse virusi ndodhet ende midis nesh, edhe pse situata epidemiologjike është përmirësuar ndjeshëm.
Ogerta Manastirliu: ”Fakti që jemi në këtë situatë i referohet masave të targetuara që kemi marrë kësaj kohe. Shqipëria është një vend, i cili, edhe sot që flasim por gjatë gjithë kësaj periudhe, është një vend që nuka pasur mbyllje totale. Ka pasur masa të intensitetit mesatar. Kjo ka sjellë që të kemi efekt të këtyre masave. Duhet thënë që jemi në një moment ku kemi numrin më të ulur ndonjëherë të rasteve aktive, gjatë këtyre muajve. Kjo s’do të thotë që ne të çlirohemi njëherë e përgjithmonë. Virusi është ende këtu, duhet të tregojmë kujdes. Masat, siç janë ora policore, mbyllja e breve, restoranteve dhe klubeve të natës, kjo ka sjellë një ulje të rasteve të infektimeve. Edhe mbajtja e maskave, mbajtja e distancës, vijojnë të jenë mjetet dhe armët me kosto të ulët që vijojnë të jenë thelbësore për kufizimin e virusit.
Evropa pas një kohe të gjatë tani është duke u hapur, për ritfillimit të aktiviteteve. Nuk ka pasur izolim tërësor të aktiviteteve. Le të besojmë te Komiteti ynë i Ekspertëve. Mund të kemi lehtësim të masave nëse situata vijon e tillë. Por duhet të jemi të kujdesshëm në lirimin e menjëhershëm të masave, sepse sjell rritje të infektimeve. Po futemi në sezonin turistik dhe Shqipëria nuk ka asnjë kusht për turistët që të futen. Sot, në krahasim me vendet e tjera, ka tregues epidemiologjik të përmirësuar, por kujdesi duhet të vazhdojë.”
