Koronavirusi ka vënë nën alarm edhe Turqinë, e cila ka urdhëruar marrjen e masave të rrepta për të frenuar përhapjen e tij.
Ministria e Brendshme turke deklaroi se të gjitha aktivitet joqeveritare do të shtyhen. Gjithashtu mësohet se është urdhëruar mbyllja e restoranteve, lokaleve, kafeneve dhe kinemave.
“Të gjitha aktivitetet joqeveritare do të shtyhen. Do të mbyllen përkohësisht kafenetë, kinematë dhe restorantet”, është shprehur ministri i Brendshëm turk.
Masa të tilla të ngjashme janë marrë edhe në Shqipëri, madje edhe më strikte se kaq. Kujtojmë se pasditen e sotme qeveria ndaloi edhe lëvizjen në këmbë pas orës 6 të mbrëmjes.
Deri më tani në Turqi janë konfirmuar 18 raste me koronavirus. Situata nga koronavirusi është rënduar në rang global. Numri i viktimave tashmë të shënuara në gjithë botën ia ka kaluar numrit të viktimave të shënuar në Kinë.
Më shumë se 6,700 persona nga e gjithë bota kanë ndërruar jetë nga koronavirusi. Ndërkohë numri total i të prekurve ka shkuar në 175,754.
