Për të parandaluar koronavirusin vdekjeprurës, shkencëtarët britanikë kanë paralajmëruar banorët që të shmangin puthjet e përqafimet në prag të festës së Shën Valentinit.
Profesor John Oxford, i Universitetit ‘Queen Mary’ tha se njerëzit duhet të mbrojnë veten e tyre nga sëmundja që është një ‘virus social’ dhe mbijeton me kontaktet e afërta mes njerëzve.
Virusi i njohur gjithashtu si SARS-CoV-2, shpërndahet me anë të piklave në frymën e dikujt dhe mbijeton disa orë në objekte, duke qëndruar infektuese.
Numri i vdekjeve brenda një dite nga koronavirusi theu një rekord të ri të mërkurën, po ashtu edhe ai i të infektuarve. Autoritetet shëndetësore kineze njoftuan për 254 të vdekur dhe 15 152 të infektuar të rinj më 12 shkurt.
Shkak i këtij numri të lartë vdekjesh ka qenë një diagnozë e re që nisi të përdorej pikërisht të mërkurën nga mjekët në provincën e Hubeit, kryeqendra e të cilit, Vuhani, është vatra e koronavirusit.
